«Мы высьветлілі, што яна неаднаразова сустракалася з супрацоўнікам контрвыведкі КДБ Беларусі Аляксеем Лабеевым, у тым ліку на Шры-Лянцы. [...] У гэтых паездках яго часам суправаджалі іншыя супрацоўнікі, якія працуюць на КДБ», — адзначаецца ў паведамленьнісуполкі.
У прыватнасьці, у студзені 2024 году на Шры-Лянку прыбыў таксама агент КДБ з пашпартам прыкрыцьця на несапраўдныя зьвесткі. «Кібэрпартызаны» таксама не раскрылі яго імя і ўмоўна назвалі «Васілём». Апроч таго, у адзін час з Лабеевым зь Беларусі на Шры-Лянку прыбыў колішні сьледчы Андрэй Андрэеў з жонкай Ірынай Андрэевай (Мацура), у мінулым супрацоўніцай Барысаўскага раённага ўпраўленьня ўнутраных спраў.
У суполцы паведамілі, што ў той жа час на адным самалёце з Лабеевым і іншым агентам КДБ зь Менску ў Маскву вылецелі 9 працаўнікоў УП "«Кока-Кола Беўрыджыз Белоруссія» — колішнія калегі Мельнікавай, у тым ліку генэральны дырэктар Аляксандар Дзянісаў, зь якім яна была асабіста знаёмай. Але ўсе яны засталіся ў Маскве.
У часе другой паездкі Анжалікі Мельнікавай на Шры-Лянку 27 лютага 2025 году Аляксея Лабеева суправаджаў яшчэ адзін чалавек, які пры рэгістрацыі паказаў дакумэнт на імя Мікалая. Ён вярнуўся ў Менск 7 сакавіка пасьля некалькіх дзён на востраве. У той жа дзень Мельнікава вылецела ў Дубай. Паводле «Кібэрпартызанаў», Лабееў, імаверна, быў зь ёй, і можа ведаць цяперашняе месцазнаходжаньне Мельнікавай.
Што вядома пра зьнікненьне Анжалікі Мельнікавай
Пра тое, што 25 сакавіка зьнікла сьпікерка Каардынацыйнай рады Анжаліка Мельнікава, паведаміў 28 сакавіка Павал Латушка. Ён сказаў, што падаў заяву аб зьнікненьні ў праваахоўныя органы Польшчы (у Анжалікі, акрамя беларускага, ёсьць польскае грамадзянства). З словаў Паўла Латушкі, апошні кантакт зь ёю адбылася 25 сакавіка раніцай. Візуальна падчас сазвону ў Зуме дэлегаты КР бачылі яе 21 сакавіка — пры гэтым невядома, адкуль яна выходзіла ў сувязь. Таксама стала вядома, што зьніклі і дочкі Мельнікавай, якія жылі зь ёю ў Варшаве.
27 сакавіка Павал Латушка падаў афіцыйны зварот у камэндатуру паліцыі Варшавы ў сувязі са зьнікненьнем Анжалікі і яе дачок. Ён адзначаў, што нефармальна інфармаваў паліцыю за «дзень-два» да 27 сакавіка. Асабіста ён бачыў Анжаліку ў канцы лютага ў офісе.
Паводле польскай паліцыі, Мельнікава ў канцы лютага вылецела за межы Эўразьвязу, у Лёндан, зь дзьвюма дочкамі. Былы муж Анжалікі выехаў з Польшчы ў Беларусь аўтобусам 23 сакавіка.
НАУ самастойна вызначыў, што мабільная прылада Мельнікавай была лякалізаваная на тэрыторыі Беларусі 19 і 25 сакавіка. Пры гэтым адзін зь яе гаджэтаў яшчэ 18 сакавіка знаходзіўся ў Варшаве.
4 красавіка сузаснавальнік ініцыятываў BY_help і BySol Аляксей Лявончык, які жыве ў Вялікай Брытаніі, падаў заявы аб зьнікненьні Мельнікавай у паліцыю Лёндану і ў нацыянальнае крымінальнае агенцтва Вялікай Брытаніі. У прэс-службе лёнданскай паліцыі 8 красавіка паведамілі выданьню ВВС, што не расьсьледуюць зьнікненьня Мельнікавай.
Журналістам «Люстэрка» 7 красавіка ўдалося датэлефанавацца да былога мужа Мельнікавай, які пацьвердзіў, што ён разам зь іхнымі дзецьмі знаходзіцца ў Беларусі. Таксама ён заявіў, што ня ведае, дзе цяпер Анжаліка Мельнікава.
Хто такая Анжаліка Мельнікава
Прадстаўніцу сьпісу «Каманда Латушкі і рух „За свабоду“» Анжаліку Мельнікаву абралі сьпікеркай Каардынацыйнай рады трэцяга скліканьня 11 ліпеня 2024 году ад блёку «Каманда Латушкі і Рух „За Свабоду“», які значна апярэдзіў астатнія кааліцыі колькасьцю атрыманых галасоў і ў выніку заняў 28 з 80 месцаў у КР.
Мельнікава скончыла Менскі дзяржаўны лінгвістычны ўнівэрсытэт і Беларускі дзяржаўны эканамічны ўнівэрсытэт. Да 2018 году была намесьніцай генэральнага дырэктара «Кока-Кола Беўрыджыз Белоруссія», пасьля пайшла ў дэкрэтны водпуск. У 2020-м яе двойчы затрымлівалі на пратэстах, сям’я выехала зь Беларусі.
З чэрвеня 2022 году яна была каардынатаркай праектаў Народнага антыкрызіснага ўпраўленьня на чале з Паўлам Латушкам.
Выступаючы на паседжаньні Каардынацыйнай рады 10 ліпеня 2024 году, яна назвала асноўнымі кірункамі сваёй дзейнасьці ў выпадку выбраньня «працу ў інтарэсах беларусаў і вырашэньне канкрэтных праблем людзей», пашырэньне паўнамоцтваў КР і яе ўзаемадзеяньня з АПК, узьняцьце ўзроўню і прэстыжу КР, структурызацыю і якаснае асьвятленьне яе працы.
Форум