«Прадстаўнікі АПК, Каардынацыйнай рады, Офісу Сьвятланы Ціханоўскай, СМІ, праваабарончых і іншых арганізацый грамадзянскай супольнасьці абмеркавалі з кіраўніцтвам структур Рады Эўропы рэалізацыю двухгадовай праграмы супрацоўніцтва», — гаворыцца ў паведамленьні.
Адзначана, што ў рамках праграмы была праведзеная «падрыхтоўка беларускіх юрыстаў», стажыроўкі для ўдзельнікаў праграмы «Кадравы рэзэрв Беларусі» для «вывучэньня прынцыпаў і мэханізмаў мясцовага самакіраваньня», а таксама «прайшлі мерапрыемствы, зьвязаныя з вывучэньнем стандартаў Рады Эўропы ў галіне гендарнай роўнасьці».
Прадстаўнік АПК па міжнародным і эўрапейскім супрацоўніцтве Ўладзімер Астапенка па выніках пасяджэньня падкрэсьліў:
«Абодва бакі адзначылі, што мерапрыемствы ў сфэры абароны правоў чалавека, свабоды СМІ і моладзевай палітыкі спрыяюць прасоўваньню стандартаў Рады Эўропы і стварэньню ўмоў для пабудовы дэмакратычнай Беларусі».
Паводле слоў Астапенкі, генэральны сакратар Рады Эўропы Ален Бэрсэ назваў фармат кантактнай групы «сыгналам беларусам і сьвету аб тым, што перамены непазьбежныя нават там, дзе адмаўляецца дэмакратыя і прыгнятаюцца правы чалавека».
Бэрсэ адзначыў, што хоць «шлях можа быць доўгім, падтрымка новай свабоднай Беларусі з боку Рады Эўропы непахісная», заявіў прадстаўнік АПК.
Беларусь — адзіная краіна на кантынэнце, якая ня стала сябрам Рады Эўропы. У сакавіку 2022 году супрацоўніцтва Рады Эўропы з рэжымам Аляксандра Лукашэнкі было прыпыненае з прычыны падтрымкі ім агрэсіі Расеі супраць Украіны, і тады ж Расея была пазбаўленая сяброўства ў Радзе Эўропы.
У якасьці альтэрнатывы Камітэт міністраў Рады Эўропы стварыў кантактную групу па супрацоўніцтве паміж РЭ і дэмакратычнымі сіламі і грамадзянскай супольнасьцю Беларусі.
Кантактная група працуе на прынцыпах празрыстасьці ва ўзаемадзеяньні з шырокім колам грамадзкіх ініцыятыў Беларусі. Яе пасяджэньні праводзяцца на рэгулярнай аснове два разы на год.
Ад Рады Эўропы ў групе ўдзельнічаюць прадстаўнікі ўсіх палітычных структур, у тым ліку ПАРЭ і Офісу камісара па правах чалавека. Рады Эўропы таксама прадставіла дэмакратычным сілам асобны офіс у сваім будынку ў Страсбурыы.
Праект новага двухгадовага пляну працы групы быў падрыхтаваны ў сьнежні 2023 году.
ГЛЯДЗІЦЕ ТАКСАМА: У ПАРЭ хочуць, каб трыбунал па расейскіх ваенных злачынствах ва Ўкраіне распаўсюджваўся і на БеларусьХто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
Сьвятлана Ціханоўская
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам